Të paktën dy persona kanë humbur jetën të shtunën si pasojë e sulmeve të reja ruse në Ukrainë, vetëm një ditë pas goditjes vdekjeprurëse ndaj një qendre tregtare në Kryvyi Rih.
Sipas autoriteteve ukrainase, një person u vra pas një zjarri në një depo në Kiev, që shpërtheu pas një alarmi për sulm me raketë balistike. Një tjetër viktimë u raportua në Zaporizhzhia, pas një sulmi me dron.
Sulmet e fundit vijnë pas goditjes së rëndë të së premtes ndaj një qendre tregtare në Kryvyi Rih. Bilanci i viktimave nga ai sulm ka arritur në të paktën 16 të vdekur dhe mbi 130 të plagosur, ndërsa nëntë persona, përfshirë dy fëmijë, vazhdojnë të konsiderohen të zhdukur.
Presidenti ukrainas Volodymyr Zelenskyy e ka dënuar sulmin në Kryvyi Rih, qytetin e tij të lindjes, duke kërkuar rritjen e presionit ndërkombëtar ndaj Moskës.
Sipas autoriteteve ukrainase, qendra tregtare u godit në dy valë, me sulmin e dytë që ndodhi rreth 30 minuta pas të parit, derisa ekipet emergjente po intervenonin.
Sulmet e reja shënojnë një tjetër përshkallëzim të ofensivës ajrore ruse ndaj qyteteve ukrainase, ndërsa lufta vazhdon prej më shumë se katër vjetësh.