Ndërsa armëpushimi i njëanshëm i shpallur nga presidenti rus, Vladimir Putin, ka hyrë në ditën e tretë dhe të fundit, njëkohësisht është raportuar për disa sulme ruse në mbarë Ukrainën, transmeton BBC.
Autoritetet policore të Ukrainës kanë raportuar se në rajonin verior të Sumyt, një grua 85-vjeçare mbeti e vrarë, ndërkaq tre persona u lënduan. 19 shtëpi dhe 10 ndërtesa të tjera u shkatërruan apo dëmtuan si pasojë e sulmeve.
Në qytetin e Kostyantynivka, në rajonin lindor të Donetskut, një person u lëndua dhe dy pallate banimi u përfshinë nga zjarri. Shërbimi shtetëror i emergjencave të Ukrainës ka thënë se ekipet e shpëtimit që mbërritën në vendngjarje u goditën nga sulme të përsëritura.
Në qytetin jugor të Khersonit, një banor lokal 58-vjeçar kërkoi ndihmë mjekësore pasi u sulmua nga një dron rus që mbante eksploziv, ka njoftuar administrata rajonale.