Guvernatori i rajonit rus të Belgorod, që shtrihet përgjatë kufirit me Ukrainën, njoftoi të shtunën se rreth 600 mijë banorë kanë mbetur pa energji elektrike, ngrohje dhe furnizim me ujë pas një sulmi me raketa nga Ukraina.
Në një deklaratë të publikuar në Telegram, guvernatori Vyacheslav Gladkov tha se autoritetet po punojnë për rikthimin e shërbimeve bazë, por e cilësoi situatën si “jashtëzakonisht sfiduese”.
Pamje të realizuara nga Reuters në qytetin e Belgorod treguan rrugë pa ndriçim, ndërsa banorët lëviznin duke përdorur pishtarë dore dhe dritat e automjeteve.
Rajoni i Belgorodit, i cili kufizohet me rajonin ukrainas të Kharkiv dhe që para fillimit të luftës kishte rreth 1.5 milion banorë, është shënjestruar vazhdimisht nga forcat e Kievit që prej shkurtit të vitit 2022, kur Rusia dislokoi dhjetëra mijëra trupa në Ukrainë.
Nga ana tjetër, Rusia ka goditur shpesh infrastrukturën energjetike të Ukrainës, duke shkaktuar ndërprerje të përditshme të energjisë elektrike dhe duke synuar edhe sistemet e ngrohjes gjatë dimrit. Një sulm gjatë natës së enjtes la pa ngrohje rreth gjysmën e blloqeve të banimit në Kiev.
Temperaturat në pjesën më të madhe të Rusisë dhe Ukrainës kanë rënë ndjeshëm nën zero gradë ditët e fundit, duke e rënduar edhe më tej situatën humanitare.