Të paktën tre persona kanë humbur jetën dhe më shumë se një duzinë janë plagosur si pasojë e një sulmi me bomba të drejtuara nga Rusia ndaj qytetit jugor ukrainas të Zaporizhzhias, njoftuan të martën autoritetet rajonale.
Sipas administratës ushtarake rajonale, shtatë kate të një ndërtese banimi nëntëkatëshe u përfshinë nga flakët pas sulmit, shkruan Reuters, transmeton Dukagjini.
Guvernatori i rajonit, Ivan Fedorov, tha se dy nga viktimat ishin në të gjashtëdhjetat, ndërsa viktima e tretë ishte 49 vjeç.
Zyrtarët ukrainas thonë se Rusia përdor gjerësisht bomba të drejtuara – armë ajrore, shpesh të epokës sovjetike, të pajisura me krahë dhe sisteme navigimi – për të goditur rajonet pranë vijës së frontit.
Pamjet e Reuters nga vendi i ngjarjes tregojnë se njëra anë e ndërtesës ishte nxirë nga zjarri, ndërsa ekipet e emergjencës po punonin për shuarjen e flakëve. Pranë objektit ndodheshin edhe automjete të djegura.
Moska mohon se shënjestron civilët, megjithatë, që nga fillimi i pushtimit në shkallë të plotë të Ukrainës në shkurt të vitit 2022, sulmet ruse kanë goditur vazhdimisht ndërtesa banimi dhe infrastrukturë tjetër civile.