Një ekip i gazetarëve është sulmuar me gurë nga persona të maskuar në veri te vendit.

Gazetarët ishin të mediumit Klan Kosova, dhe ishin sulmuar saktësisht në fshatin Zupç, ku edhe është e vendosur një barrikadë.

Klan Kosova raporton se nga ky sulm kanë mbetur të lënduar gazetarja dhe shoferi.

Drejtori i këtij mediumi, Adriatik Kelmendi, ka thënë se gazetarja dhe shoferi kanë pësuar lëndime të lehta, dhe se ky sulm është kryer nga serbë të maskuar.

“Sot u sulmua sërish ekipi i Klan Kosovës në Zubin Potok. Gazetarja Qëndresa Bellagoshi dhe shoferi Elsad Sinani kanë pësuar lëndime të lehta, kurse kameramani Agon Bejtullahu dhe gazetari Drin Demiri nuk janë lënduar. Xhamat e veturës janë thyer. Sulmi ka ndodhur nga serbë të maskuar në fshatin Zupç”, ka thënë ai.

Ky nuk është sulmi i vetëm ndaj gazetarëve në veri, por është i pari me të lënduar.