Ministri i Punëve të Brendshme, Xhelal Sveçla, ka deklaruar se gjashtë nga pjesëtarët e grupit terrorist që i sulmuan policët e Kosovës, janë duke i trajtuar plagët në Spitalin e Novi Pazarit në Serbi.
Sveçla i bëri thirrje Serbisë që t’i kthejnë në Kosovë të gjykohen.
Ministri, po ashtu, tha se asnjë civil nuk është lënduar nga aksioni i Policisë së Kosovës në Banjskë të Zveçanit.
“Në shkëmbimin e zjarreve mes grupeve të armatosura dhe policisë sonë kanë mbetur të vrarë së paku 3 të vrarë, nga ta të gjithë me unifomra dhe pajisje ushtarake, ndërsa janë arrestuar dy të tjerë, dhe katër persona të cilët kanë qenë në rolin e tyre mbështetës në këtë aktivitet. Vlen të theksohet se asnjë person civil nuk është lënduar nga ky aksion, sipas informatave të deritanishme gjashtë terroristë të plagosur të trajtohen në spitalin e Novi Pazarit, dhe kërkojmë nga Serbia që ata t’i dorëzojnë menjëherë autoriteteve të Kosovës që t’i përgjigjen drejtësisë për aktet e tyre terroriste”, ka thënë ai.