Ministri në detyrë i Punëve të Brendshme, Xhelal Sveçla, është dënuar me një vit burgim me kusht nëse brenda periudhës së verifikimit nuk kryen ndonjë vepër tjetër penale, në rastin që lidhet me hedhjen e gazit lotsjellës në Kuvendin e Kosovës.
Ministri në detyrë nuk ishte i pranishëm në momentin e shqiptimit të dënimit.
Sveçla akuzohej për veprën penale “Përdorimi i armës apo mjetit të rrezikshëm”, lidhur me rastin e 21 marsit 2018, kur në sallën e Kuvendit ishte hedhur gaz lotsjellës dhe seanca plenare ishte ndërprerë.
Në seancën gjyqësore, Prokuroria kishte propozuar një dënim më të lartë për Sveçlën.
“Propozojmë që me rastin e matjes së dënimit të pandehurit Xhelal Sveçla t’i shqiptohet dënim me burgim efektiv në kohëzgjatje prej dy vitesh dhe dënim me gjobë në shumën prej 3 mijë eurosh”, ishte thënë në propozimin e Prokurorisë.
Megjithatë, gjykata ka vendosur që Sveçlës t’i shqiptohet një vit burgim, me kushtin që ai të mos kryejë vepër tjetër penale gjatë periudhës së përcaktuar nga gjykata.
Aktakuza për rastin e gazit lotsjellës ishte ngritur ndaj Sveçlës dhe disa ish-deputetëve të Lëvizjes Vetëvendosje, të cilët akuzoheshin se kishin aktivizuar dhe hedhur bombola të gazit lotsjellës në sallën e Kuvendit gjatë seancës së 21 marsit 2018.