Ministri i Punëve të Brendshme i Kosovës, Xhelal Sveçla, ka bërë të ditur se pas paralajmërimit të grupeve ekstremiste serbe për protesta, janë vërejtur grupe ekstremistësh të maskuar.
“Pas paralajmërimit të grupeve ekstremiste serbe për protesta sot pas orës 18:00, janë vërejtur grupe ekstremistësh të maskuar të cilët në prani të policisë së Serbisë, brenda territorit të Serbisë, kanë ndaluar veturat dhe legjitimuar udhëtarët,” ka shkruar Sveçla në Facebook.
Teksa njofton se një familje e cila po udhëtonte për në Gjermani, “i është pamundësuar vazhdimi i udhëtimit dhe është kthyer prapa me forcë.”
E që kjo po ndodh në sytë e policisë serbe, Sveçla thotë se e bën bashkëfajtore, po ashtu e quan akt fashist.
“Kjo po ndodhë para syve të policisë së Serbisë, fakt ky që e bën atë bashkë fajtore. Këto akte fashiste ku serbët lejohen pavarësisht dokumentacioneve që posedojnë kurse shqiptarët pengohen pavarësisht dokumentacioneve që posedojnë, janë absolutisht të papranueshme për ne.”
Sveçla njofton se deri në stabilizimin e qarkullimit normal, të papengueshëm dhe të sigurtë për të gjithë udhëtarët, pika kufitare në Bërnjak mbyllet për qarkullim.