Ministri në detyrë i Punëve të Brendshme, Xhelal Sveçla, ka njoftuar për ndarjen nga jeta të zyrtarit policor Altin Kryeziu, i cili ditë më parë ishte goditur nga një automjet gjatë kryerjes së detyrës zyrtare.
Përmes një postimi në Facebook, Sveçla ka shprehur dhimbjen për humbjen e Kryeziut, duke e cilësuar atë si pjesëtar shembullor të Policisë së Kosovës, të përkushtuar ndaj detyrës dhe sigurisë së qytetarëve.
“Me dhimbje të thellë mora lajmin për ndarjen nga jeta të Zyrtarit Policor Altin Kryeziu, i cili ditë më parë u godit nga një automjet gjatë kryerjes së detyrës zyrtare”, ka shkruar Sveçla.
Ai ka shprehur mirënjohje për personelin mjekësor, i cili, sipas tij, bëri gjithçka të mundur për trajtimin e Kryeziut deri në momentet e fundit të jetës.
Sveçla gjithashtu ka apeluar te të gjithë pjesëmarrësit në komunikacion që të tregojnë kujdes dhe përgjegjësi maksimale, duke theksuar se pakujdesia në trafik mund të kushtojë jetë.
Në fund, ministri ka shprehur ngushëllime për familjen Kryeziu, kolegët e tij në Policinë e Kosovës dhe të gjithë ata që e kanë njohur Altinin.