Ministri i Punëve të Brendshme të Kosovës, Xhelal Sveçla, i ka numëruar aksionet e Policisë të ditës së enjte, të cilat i ka cilësuar si të suksesshme.
Përmes një statusi në Facebook, Sveçla ka thënë se lufta ndaj “ilegaliteteve që cenojnë jetën e qytetarëve tanë nuk ka alternativë”.
Ai ka bërë të ditur se, Dogana e Kosovës të enjten ka konfiskuar mbi gjashtë tonë mallra të konfiskuara nga Serbia.
Po ashtu, ai ka shkruar edhe për aksionin e Policisë së Kosovës në bashkëpunim me Prokuorinë, ku janë sekuestruar kamerat e vendosura dhe të kontrolluara nga strukturat paralele të Komunës së Shtërpcës.
Policia e Kosovës të enjten e shtatë korrikut ka zhvilluar një aksion për bastisjen e disa lokacioneve në komunën e Shtërpcës.
Policia e Kosovës ka zbatuar urdhrin e Gjykatës së Ferizajt për bastisjen e pesë lokacioneve në Shtërpcë dhe largimin e kamerave të vendosura nga strukturat ilegale.
Rasim Maloku ka theksuar se ky aksion ndërlidhet me disa të arrestuar në rastin “Brezovica”.
“Ky aksion nuk lidhet direkt me ndërtimet pa leje në Brezovicë, por ndërlidhet me disa të arrestuar të Brezovicës pasi që njëri nga ta, përkatësisht ish-kryetari i komunës Bratisllav Nikoliq është edhe koordinator i strukturave ilegale, e që këto struktura kanë menaxhuar me kamerat e sigurisë që kanë monitoruar lëvizjet e qytetarëve dhe institucionet publike të Republikës së Kosovës, e që këto informacione janë përcjellë në strukturat e sigurisë në Serbi”, ka thënë Maloku.
Sipas tij, janë katër lokacione të bastisura, ku janë larguar edhe kamerat e sigurisë.