Pas aksionit antidrogë në Mitrovicë, ka reaguar ministri i Punëve të Brendshme, Xhelal Sveçla, i cili ka thënë se bashkëpronar i laboratorit tashmë të shkatërruar është personi i cili sulmoi Policinë e Kosovës në Urën e Bistricës muajin e kaluar, ndërsa njëri nga të arrestuarit në këtë operacion është edhe vëllai i tij.
Me anë të një postimi në llogarinë e tij në Facebook, ministri i këtij dikasteri ka theksuar se pavarësisht angazhimeve të policisë, kriminelët ende po mendojnë se mund të vazhdojnë me shkeljen e ligjit dhe kundërligjshëm të pasurohen në kurriz të sigurisë dhe mirëqenies së qytetarëve.
“Sot Policia e Kosovës në kuadër të detyrave të saj në zbatim të ligjit, ka identifikuar dhe shkatërruar një laborator droge në Mitrovicë të Veriut me ç’rast është arrestuar pronari i këtij laboratori. Bashkëpronar i laboratorit tashmë të shkatërruar është personi i cili sulmoi Policinë e Kosovës në Urën e Bistricës muajin e kaluar, ndërsa njëri nga të arrestuarit në këtë operacion është edhe vëllai i tij. Çdo tentativë e Serbisë që përmes bandave kriminale të destabilizojë Kosovën është e kotë dhe e dështuar”, shkroi ai.
Sveçla ka potencuar se Qeveria e Kosovës mbetet e përkushtuar maksimalisht që, jo vetëm me institucionet e sigurisë, por edhe me gjithë shoqërinë të luftojë çdo fenomen negativ dhe të forcojë shtetin e ligjin.
Policia e Kosovës ka njoftuar të dielën se është duke zhvilluar një aksion antidrogë në Mitrovicë, konkretisht në rajonin verior të kësaj komune.
“Policia e Kosovës, konkretisht Drejtoria për Hetimin e Trafikimit me Narkotikë, në vazhdën e luftës për parandalimin dhe luftimin e rasteve të abuzimit me substanca narkotike, pas hetimeve intensive sot më 12 shkurt të vitit 2023, në rajonin e Mitrovicës veri, është duke realizuar një operacion policor antidrogë, me mbështetjen edhe të njësive tjera relevante policore”, thuhet në komunikatën e policisë.
Ndërkaq, Policia e Kosovës ka bërë të ditur se rezultatet apo detajet e operacionit antidrogë do të publikohen me kohë pas marrjes së raporteve apo informacioneve nga njësitet në terren.
Gjithashtu, në komunikatë thuhet se Policia e Kosovës në fushën e parandalimit, hetimit dhe zbulimit të trafikimit me narkotikë, edhe gjatë vitit të kaluar ka ndërmarrë disa operacione të suksesshme policore, ku sipas tyre, janë konfiskuar sasi e konsiderueshme e substancave të dyshuara narkotike, janë zbuluar laboratorë droge, janë arrestuar numër i madh i personave të dyshuar, si dhe janë shpartalluar grupe të ndryshme kriminale në mbarë vendin.