Lidhur me disa akuza për një kontratë njëburimore për të cilën u tha se u negociua përmes ministrit të Punëve të Brendshme, Xhelal Sveçla u deklarua duke thënë se “nuk ka kontratë brenda MPB-së që nuk kalon nëpër filtra ligjor”.
Sveçla gjatë një interviste në “Kallxo Përnime” u pyet lidhur me akuzat që bëri i pari i Lidhjes Demokratike të Kosovës, Lumir Abdixhikut rreth një tenderi 15 milionë euro që tha se u dha përmes negocimit.
Për këtë çështje, ministri tha se në asnjë kontratë nuk negocion ai, e se nuk ka detaje për tenderin në fjalë, por që detajet mund t’i ofroj përmes përgjigjeve me shkrim.
Madje Sveçla u deklarua edhe pse ka nënshkrim të kontratave njëburimore brenda Ministrisë të cilën e drejton ai.
“Në një situatë kur i gjithë globi është në tension, kur përmendet edhe bombat nukleare, kur ke atak të drejtpërdrejtë të një shteti armik dhe t’i punon për tu mbrojt me i pas të gjithë tenderët publik, me i tregu edhe Serbisë edhe Rusisë të gjitha këto gjëra” – tha ai.
Tutje ministri tha se i kujtohen disa raste kur pa i ditë ende disa gjëra Policia, bëheshin publike.
Sipas Sveçlës, kontratat e shumta njëburimore të Qeverisë së Kosovës tregojnë se edhe po punohet edhe po mbrohet vendi.
“Për mua është banale disa kontrata të cilat janë, apo kanë qenë publike” – theksoi ministri Sveçla.
Madje, ministri tha se disa kontrata të Policisë së Kosovës duhet të jenë konfidenciale, ashtu siç janë edhe në vende të tjera.