Ministri i Punëve të Brendshme, Xhelal Sveçla, ka thënë se Policia e Kosovës ka mandat dhe detyrë ofrimin e sigurisë, garantimin e rendit dhe sundimin e ligjit.
Ministria deklaroi se rritja e prezencës policore në veri të Kosovës është bërë me qëllim të ofrimit të sigurisë për të gjithë qytetarët.
“Policia e Kosovës ka mandat dhe detyrë ofrimin e sigurisë, garantimin e rendit dhe sundimin e ligjit. Ditëve të fundit, pas sulmeve të njëpasnjëshme të armatosura ndaj zyrtarëve policor dhe qytetarëve në veri të vendit, rritja e prezencës policore me qëllim të ofrimit të sigurisë për të gjithë qytetarët është vlerësuar e domosdoshme”, ka shkruar Svecla në Facebook.
Sveçla ka lutur të gjithë qytetarët të ruajnë qetësinë dhe të bashkëpunojnë me Policinë e Kosovës të cilët janë duke u angazhuar për rend dhe siguri për të gjithë qytetarët pa asnjë dallim.
Sipas njoftimit tashmë zyrtar të Policisë së Kosovës, gjatë ditës së enjte është shtuar prezenca e policisë së rendit në veri të vendit.