Ministri i Punëve të Brendshme të Kosovës, Xhelal Sveçla, në seancën e së enjtes në Kuvendin e Kosovës, është përplasur me shefin e Grupit Parlamentar të Partisë Demokratike të Kosovës(PDK), Abelard Tahiri.
Duke debatuar për statistikat për luftimin e krimit dhe korrupsionit, Sveçla dhe Tahiri filluan me akuza ndaj njëri-tjetrit.
Ishte ministri Sveçla që tha se ai nuk blen armë zjarri me para të shtetit, sic thotë ai që ka bërë Tahiri sa ka qenë shef i kabinetit të ish-kryeministrit Hashim Thaçi.
“2019 ka pasur më shumë arrestime të opozitës se kriminelëve të lartë. Fundi i fundit, asnjë skandal të qeverisë nuk e kemi pasur. Unë nuk blej allti me para të shtetit dhe pastaj mos ta kthej kur e lëshon pozitën”, ka thënë ai.
Por deputeti opozitar, Tahiri ka thënë se ministri Sveçla do të mbahet mend vetëm për nepotizëm.
“Je ministër që do të mbahesh mend për punësimin e motrave, akrabave dhe të rrethit. Ti ma shumë mbahesh mend për familjarizëm se sa për angazhim në fuqizimin e rendit publik. Ky është një problem shumë i madh i yti”, ka thënë ai.
Ndryshe, gjatë ditës seancës së sotme, ka pasur përplasje dhe replika të shumta në lidhje me Fondin e Sigurisë.