Ministri i Punëve të Brendshme, Xhelal Sveçla në një konferencë të përbashkët me kryeministrin e Kosovës, Albin Kurti në lidhje me situatën aktuale në veri ka thënë se situata atje është e tensionuar, pasi rezistenca e grupeve kriminale atje është e veshur me një petk politik që është marrë nga Beogradi zyrtar.
Sveçla ka thënë se Serbia i përdor këto grupe ekstremiste për të kamufluar propozimet për marrëveshje të cilat nuk janë të pranueshme për të.
“Situata në veri është e tensionuar, pasi strukturat kriminale atje janë të pakënaqura. Rezistenca e këtyre grupeve herë-herë ka qenë e armatosur, ka pasur 11 sulme ndaj zyrtarëve të policisë, ka qenë e veshur me një petk politik që është marrë nga Beogradi Zyrtar”, ka deklaruar Sveçla.
Megjithatë, ai ka thënë se kjo është një situatë e cila është duke u menaxhuar shumë mirë nga institucionet e Kosovës, gjithmonë duke qenë në koordinim me KFOR-in dhe EULEX-in.
Ndërsa i pyetur për dorëheqjet e policëve serbë nga Policia e Kosovës, ka thënë se janë duke u shqyrtuar dorëheqjet.
“Policia e Kosovës ka rregulloret e brendshme, janë duke u shqyrtuar dorëheqjet, në mënyrë që çdo veprim i Policisë së Kosovës të jetë në përputhje me rregullativat e tyre”.
Ministri Sveçla ka bërë të ditur se si të përfundojë kjo procedurë do të hapet konkursi për pranimin e policëve të rinj.