Ministri i Punëve të Brendshme, Xhelal Sveçla, ka thënë se sulmet ndaj zyrtarëve policorë në veri, kanë për qëllim destabilizimin e vendit, për shkak të vendosjes së ligjshmërisë në atë pjesë.
Në Komisionin për Çështje të Sigurisë dhe Mbrojtjes, gjatë ditës së premte, ka raportuar ministri i Punëve të Brendshme Xhelal Sveçla.
Duke raportuar në këtë komision, Sveçla ka paraqitur sukseset gjatë një viti të qeverisjes.
Ai është shprehur se primare ka qenë forcimi i institucioneve të sigurisë, përmes rritjes së kapaciteteve.
Sveçla para deputetëve ka theksuar sukseset, të cilat, sipas tij, janë arritur në luftimin e krimit dhe korrupsionit, raporton kp.
“Gjatë vitit të parë qeverisës janë realizuar 1000 operacione policore dhe janë goditur 50 grupe kriminale. Si pasojë e kësaj janë ngrirë rreth 14 milionë euro”, ka thënë ai.
Po ashtu, ai ka thënë se Policia e Kosovës po ballafaqohet me vështirësi dhe mungesa të mëdha të uniformave dhe armatimit.
Sveçla ka thënë se kjo po ndodh si pasojë e mosfunksionalizimit të Organit Shqyrtues të Prokurimit (OSHP).
“Policia e Kosovës ballafaqohet me vështirësi të mëdha, shpesh të paarsyeshme. Sa i përket uniformave, armatimit, shumë nga këto kanë rrjedhur si pasojë e OSHP-së. Unë shpresoj që shpejt OSHP-ja do të zhbllokohet”, ka thënë Sveçla.
Po ashtu, duke folur për vizitat dhe takimet e tij në shtete të ndryshme, Sveçla ka thënë se Kosova i ka plotësuar të gjitha kriteret e nevojshme, për liberalizimin e vizave.
“Kam realizuar numër të vizitave të cilat kryesisht ndahen në 2 kategori. Bashkëpunime multilaterale në kuadër të iniciativave të ndryshme qoftë të BE-së, qoftë të rajoneve dhe vizitave tematike. Tashmë, ekziston një qëndrim publik se Kosova i ka plotësuar kriteret e nevojshme që të fitojë të drejtën e lëvizjes së lirë”, ka thënë ai.
Ai ndër të tjera, ka shtuar se duhet të kalohet së pari nëpër të gjitha kërkesat e Bashkimit Evropian(BE), të kalohet në të gjitha kërkesat e shteteve individuale, e pastaj këto kërkesa bashkarisht në kombinim me angazhimin dhe sukseset të ballafaqohen me përgjegjësitë.
Ndryshe, pjesëtarët e Policisë së Kosovës, javëve të fundit kanë qenë cak i disa sulmeve në veri të vendit.
Nga 13 deri më 26 prill, Policia e Kosovës është sulmuar gjashtë herë.
Sa u përket këtyre sulmeve në veri ndaj Policisë së Kosovës, Ministria e Punëve të Brendshme e kishte cilësuar sulmin si akt terrorist, që “është bërë me qëllim të frikësimit të zyrtarëve policorë, por dhe të gjithë qytetarëve të Kosovës”.