Ministri i Punëve të Brendshme, Xhelal Sveçla, gjatë takimit me homologun e tij nga Çekia, Vit Rakusan, ka diskutuar për çështjen e liberalizimit të vizave.
Në një postim në llogarinë e tij në Facebook, Sveçla e ka falënderuar për mbështetjen e vazhdueshme ndaj Kosovës, ministrin e brendshëm çek i cili njëkohësisht është edhe zëvendëskryeministër i parë.
“Sot pata nderin të takohem me Zëvendëskryeministrin e parë dhe ministrin e Punëve të Brendshme të Republikës Çeke z. Vit Rakusan dhe të falenderoj nga afër për mbështetjen e vazhdueshme ndaj Kosovës si dhe mbështetjen konkrete të presidencës çeke për të shtyrë përpara procesin e liberalizimit të vizave për Kosovën”, shkroi ministri.
Sveçla ka theksuar se në takim pos procesit të liberalizimit të vizave është diskutuar edhe për rezultatet e arritura në luftën kundër korrupsionit dhe krimit si dhe për përkushtimin e këtij dikasteri në proceset e integrimit evropian.
“E njoftova lidhur me prioritetet dhe rezultatet e arritura në fushën e luftimit të krimit e korrupsionit, migrimit të paligjshëm dhe kontrabandës në përgjithësi si dhe angazhimin tonë për të shtyrë përpara proceset e integrimit evropian”, ka shkruar Sveçla.
Sipas ministrit të këtij dikasteri, ministri Rakusan ka përgëzuar institucionet e Kosovës për rezultatet e dukshme të arritura kohën e fundit në luftën kundër krimit dhe korrupsionit.
“Konfirmoi përkrahjen e parezervë të Qeverisë së Republikës Çeke në proceset integruese, përfshirë edhe procesin e liberalizimit të vizave”, vijon shkrimi i Sveçlës.
Po ashtu, të dy ministrat janë dakorduar që të dyja vendet kanë potencial shumë të madh për të rritur bashkëpunimin në shumë fusha të ndryshme.
“Me theks tek bashkëpunimi policor, shkëmbimi i informacioneve dhe fushave tjera me interes të përbashkët për të kontribuuar kështu së bashku për sigurinë në rajon dhe më gjerë”, ka thënë ai.