Në Prishtinë ka nisur punimet Forumi i Parë i Investimeve të Qëndrueshme, organizuar nga Këshilli i Investitorëve Evropianë (EIC), i cili ka për qëllim ofrimin e një platforme për diskutim dhe prioritizim të nevojave në vend.
Tomas Szunyog, shef i Zyrës së BE-së në Kosovë, në fjalimin e tij ka theksuar se zbatimi i zhvillimit dhe i investimit të qëndrueshëm është diçka e domosdoshme.
“Ky është një diskutim me kohë për Kosovën, në fazën e vet të zhvillimit dhe të pikëvështrimit të rrethanave ndërkombëtare. Kemi dëgjuar për investime të drejtpërdrejta, remitanca gjithnjë në rritje, rritjen e vendeve të punës dhe disa zhvillime pozitive. Të gjitha këto janë zhvillime të mira në raporte të huaja. Zbatimi i zhvillimit dhe i investimit të qëndrueshëm është diçka e domosdoshme, sidomos nga pikëvështrimi i ikjes së trurit. Po shohim gjëra pozitive që po ndodhin në sektorin e energjisë”, ka deklaruar ai.
Po ashtu, Szunyog ka bërë thirrje që Kosova të heqë sa më shpejt ndalimin e produkteve serbe.
“Për Kosovën dhe Serbinë do të ketë disa kushte shtesë që të angazhohen në mënyrë konstruktive me rezultate të prekshme në përmirësimin e marrëdhënieve. Në këtë drejtim lëvizja e lirë e mallrave, e shërbimeve dhe e punëtorëve, paraqitet më shumë në planin zhvillimor. Inkurajojmë Kosovën që të heqë sa më shpejt ndalimin e produkteve serbe në Kosovë. Investimet e qëndrueshme kërkojnë vëmendjen e të gjithëve”, ka thënë ai, transmeton EO.
Në hapje të forumit dyditor, Emrush Ujkani, drejtor ekzekutiv i Këshillit të Investitorëve Evropianë, ka thënë se si Këshill i përkrah këto iniciativa dhe do të eksplorojnë tema thelbësore për projekte që çojnë nga tërheqja e kapitalit të BE-së.
Ndërsa, Luan Dalipi, shef i kabinetit të Kryeministrit, ka thënë se si Qeveri kanë qenë në gjendje t’i kultivojnë disa vlera, të cilat kanë rezultuar me ndërtimin e sistemeve të mira.
Ai ka theksuar se ekzekutivi ka dy funksione kryesore te biznesi, atë të zhvillimit dhe të përkrahjes.