Shefi i grupit parlamentar të Aleancës për Ardhmërinë e Kosovës (AAK), Besnik Tahiri, pas mbledhjes së Kryesisë së Kuvendit, ka folur dhe rreth çështjes së dinarit.
Tahiri ka thënë se kjo çështje nuk do të duhej të bëhej temë diskutimi në Bruksel.
Ai është shprehur se kjo është një çështje e brendshme të cilës duhet t’i jepet një zgjidhje në Kosovë me partnerët ndërkombëtarë.
“Euro është valuta e vetme në Kosovë. Për këtë temë duhet të ketë diskutime të brendshme në Kosovë dhe assesi tema e dinarit të kalojë temë në Bruksel. Kjo është çështje e brendshme, kësaj çështjeje duhet t’i ipet një zgjidhje në Kosovë me partnerët tanë ndërkombëtarë”, ka thënë ai.
Sipas shefit të grupit parlamentar të AAK-së, nuk ka logjikë që një çështje e brendshme të bëhet temë ndërkombëtare.
“Ajo që duhet të bëjë qeveria është që këtë temë ta diskutojë në Kosovë me palë të interesuara, a është BE apo ShBA, duhet të diskutohet në Prishtinë, pse duhet të shkojmë në Bruksel për valutën e Kosovës?. Nuk ka logjikë që një çështje e brendshme të bëhet temë ndërkombëtare”, ka thënë ai.