Ish-kryenegociatorja e Kosovës në dialogun me Serbinë, Edita Tahiri, ka reaguar pas marrëveshjes në mes të Kosovës dhe Serbisë, për lëvizjen e lirë.
Tahiri ka theksuar se kjo marrëveshje ishte arritur në vitin 2011, dhe ka shtruar pyetje në drejtim të Qeverisë së Kosovës, për arsyet se pse ende nuk është publikuar teksti i marrëveshjes.
“Marrëveshja për finalizimin e zbatimit të marrëveshjes për lëvizjen e lirë të 2011 u arrit për letra shoqëruese, ajo e targave po pritet. Pyetja është pse nuk po publikohet teksti i kësaj marrëveshjeje?”, ka shkruar Tahiri në Facebook.
Më 27 gusht të këtij viti, Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, e ka dhënë lajmin se është arritur një marrëveshje në mes Kosovës dhe Serbisë, pasi Serbia kishte rënë dakord t’i shfuqizojë dokumentet për hyrje-dalje për qytetarët e Kosovës.
“Sipas Dialogut të lehtësuar nga BE-ja, Serbia ra dakord të shfuqizojë dokumentet e hyrjes/daljes për mbajtësit e letërnjoftimeve të Kosovës dhe Kosova u pajtua që të mos i prezantojë ato për mbajtësit e letërnjoftimeve serbe”, kishte shkruar Borrell.
Ndërkaq, të dielën në Serbi është bërë publike një letër e cila parashihet të vendoset në pjesën serbe të kufirit. Kjo letër tregon se dokumentet e Republikës së Kosovës do të pranohen për lëvizje të lirë, por se ato nuk nënkuptojnë pranimin e pavarësisë së Kosovës.