Shefi i Grupit Parlamentar i Partisë Demokratike të Kosovës (PDK), Abelard Tahiri, e ka akuzuar kryeministrin e Kosovës, Albin Kurti, se “ka refuzuar” ta arrestojë kriminelin, Milan Radojçiq, “ndonëse e ka parë në kohë reale” të armatosur në territorin e Kosovës.
Në seancën e së premtes në Kuvendin e Kosovës, Tahiri ka thënë se Kurti ka ndaluar Policinë e Kosovës ta arrestojë atë kriminel duke thënë se arsyet i di vetëm ai (Kurti).
“Ky kryeministër, që në kohë reale e ka parë Radojçiqin në Republikën e Kosovës, të armatosur me grup të armatosur dhe e ka ndaluar Policinë e Kosovës ta arrestojë. Nuk ka dashur ta fusë në burg personin të cilin e ka pasë në dorë. E ka parë në kohë reale, ka refuzuar ta arrestojë. Arsyet ne nuk i dimë, i di ky. Koha do ta shpjegojë”, ka thënë Tahiri.
Ndryshe, Millan Radojçiq ka pranuar se e ka organizuar sulmin terrorist ndaj Policisë së Kosovës më 24 shtator në Banjskë të Zveçanit dhe se ka qenë pjesë e këtij grupi të armatosur.