Shefi i Grupit të Aleancës për Ardhmërinë e Kosovës (AAK), Besnik Tahiri, ka akuzuar kryeministrin e Kosovës, Albin Kurti, në lidhje me vendimin e djeshëm për Manastirin e Deçanit, duke i thënë se “ke marrë 4500 vota në Deçan duke premtuar për kauza të cilat nuk ka çare pa i bë”.
Në seancën e së enjtes, Tahiri ka thënë se ndonëse AAK nuk komenton vendimet e Kushtetueses, sipas tij, qeveria duhet të reflektojë sepse proceset politike dhe ato të sigurisë që po vijnë nuk janë të lehta.
“Nuk mund të dal prej foltores pa i thënë atij zotërisë që nuk është këtu, nuk ke lënë të zezë, je ngrit mbi kultin duke u thënë jeni të shantazhuar, jeni të kapur, jeni hajna, ke marrë mbi 4500 vota në Deçan duke premtuar për kauza që e ke ditë që s’ke çare pa i bë, kërkesa ime është që qeveria të reflektojë se proceset politike e të sigurisë që po vinë Kosovës nuk janë të lehta, mos i leni deri në momentin e fundit”, ka thënë Tahiri.
Ndërsa, për kontratat njëburimore, për të cilat, po diskutohet tani në Kuvend, Tahiri ka thënë se janë burim i korrupsionit dhe e dëmtojnë buxhetin.
“Kontratat njëburimore edhe pse janë të lejuara, tregojnë se janë mjeti më i mirë për dëmtimin e konkurrencës së lirë, për korrupsion, për favorizim nga sektori publik në atë privat”, ka vijuar ai.