Abelard Tahiri, shef i grupit parlamentar të Partisë Demokratike të Kosovës (PDK), ka njoftuar se do t’i nisin procedurat për shpërbërjen e Kuvendit në ditët e ardhshme. Ai ka bërë këtë deklaratë pas një mbledhjeje të Kryesisë së Kuvendit të mbajtur të premten, duke theksuar se afati final për shpërbërjen e legjislaturës aktuale është fundi i prillit.
Tahiri ka theksuar se për të rrëzuar qeverinë aktuale nevojiten të paktën 61 vota në Kuvend, të cilat momentalisht mungojnë. Ai ka sugjeruar se një zgjidhje më e lehtë për këtë situatë do të ishte që partia në pushtet ta shpërbëjë vetë Kuvendin.
“Duhet së paku 61 deputetë që ta rrëzojmë qeverinë, këta numra nuk i kemi. Për të dalë më lehtë nga kjo situatë e rëndë, i kemi dhënë një mundësi më të lehtë partisë në pushtet, që ta shpërbëjë Kuvendin”, ka thënë Tahiri.
Tahiri shtoi se PDK-ja shumë shpejt do t’i nisë diskutimet edhe me partitë opozitare që vendi të shkojë në zgjedhje sa më shpejt. Ai ka folur edhe për komisionet hetimore të cilat po dështojnë të votohen nga pushteti. Tahiri ka thënë se nuk do të heqin dorë nga kërkesa për themelimin e tyre.
“Nuk do të heqim dorë, do të kërkojmë sërish themelimin e Komisionit Hetimor për kontratat njëburimore. Po flasim për rreth 220 milionë euro që janë shpenzuar këto dy vjet pa llogaridhënie e pa transparencë. Nuk shoh që ka disponim nga LVV-ja për votimin e këtyre komisioneve”, ka thënë ai.
Kjo zhvillim i ri në politikën e Kosovës mund të çojë në zgjedhje të parakohshme në qershor, nëse Kuvendi shpërbëhet brenda afatit të përcaktuar.