Shefi i Grupit Parlamentar, të PDK-së, Abelard Tahiri, i ka kritikuar krerët e institucioneve të Kosovës, duke thënë se në vitin 2022 Kosova nuk e ka marrë asnjë njohje të re.
Po ashtu, ai ka përmendur mosanëtarësimin e Kosovës në organizata ndërkombëtare dhe mosarritjen e liberalizimit të vizave.
“Gjatë vitit 2022, Kosova nuk ka pasur asnjë njohje të re, nuk është anëtarësuar në Këshill të Evropës, as në Interpol, nuk ka as liberalizim vizash e as status kandidati për BE, as anëtarësim në Partneritet me NATO-n, dhe për më keq, vetë përbërja e shtetit tonë është bërë temë diskutimi në koncept nota e propozime”, ka thënë ai.
Tahiri e kritikoi edhe presidenten e vendit, Vjosa Osmanin, për të cilën tha se përveç mllefit të cilin e përdor për t’i mbuluar dështimet politike nuk ka treguar asgjë më shumë.
“Kështu që në Konferencën e Ambasadorëve që u mbajt dje, presidentja Osmani iu dha leksion ambasadorëve të Kosovës, se si duhet të flasin e përfaqësojnë Kosovën, pa pasur t’iu japë as edhe një shembull të vetëm, se si ajo e ka përfaqësuar vendin, çka ka arritur e me çka është dalluar në politikën e brendshme apo të jashtme gjatë këtij viti, përveç mllefit që e përdor si “armë” për të mbuluar deficitet politike”, ka thënë ai.