Shefi i Grupit Parlamentar të Partisë Demokratike të Kosovës (PDK), Abelard Tahiri, në seancën e Kuvendit të Kosovës ka kërkuar raport nga qeveria në lidhje me zjarrin që kaploi ndërtesën e Institutit të Mjekësisë Ligjore më 21 nëntor, ku përfshiu disa zyra në katin e dytë të ndërtesës, si dhe pjesën e çatisë mbi të.
Ai ka kërkuar nga qeveria një raport në lidhje me atë se çfarë është dëmtuar në këtë institut nga zjarri, duke kërkuar detaje se a janë shkatërruar mbetjet mortore dhe ekspertiza të ndryshme.
“Skandalet janë aq të mëdha, sa që është problem, a të flasim për grabitjet, apo institutin e IML-së për djegiet dhe ende nuk kemi ndonjë raport për dëmet që janë bërë, kemi edhe dështimin e regjistrimit të popullsisë vetëm për mos ta nxjerrë shifrën e saktë, sepse shifrat e migrimit janë të frikshme. Prej ardhjes së VV-së në pushtet, u ballafaquam me humbjen e mostrave të Deharit, ky institucion humbi mostrat e Deharit, u ballafaquam me një zjarrvënie të dyshimtë, përpos që krijoi dëme milionëshe, ende nuk e kemi të qartë se cilat janë dëmet që ka shkaktuar përmbajtësisht në këtë institucion”, ka thënë Tahiri.
Ai ka thënë se javën tjetër PDK-ja do të propozojë themelimin e një Komisioni Hetimor Parlamentar për një raport në lidhje me dëmet që janë shkaktuar nga zjarri në IML.
“Çfarë raporti dhe ekspertiza për vrasje të dyshimta janë zhdukur nga kjo djegie, tani e tutje kemi parë heshtje, qetësi absolute nga VV për rastin Dehari. Ju kemi pritur për tre vjet ta trajtoni një çështje të tillë, do t’i propozojmë kuvendit një komision hetimor që do të hetojë dëmet që ka shkaktuar ky dëm në IML”, ka vijuar ai.