Shefi i Grupit Parlamentar të Aleancës për Ardhmërinë e Kosovës, Besnik Tahiri, ka kritikuar Qeverinë e Kosovës për “mashtrimin” që u bën qytetarëve të Kosovës.
Në një postim në Facebook, Tahiri ka thënë se edhe pse Qeveria aktuale në krye me kryeministrin Albin Kurti e ka në dorë që të bëjë rritjen e pagave, sipas tij, nuk po e bën këtë gjë.
“Rrugës për te Kuvendi i Kosovës e dëgjova konferencën për media të kryeministrit Albin Kurti dhe ministrit të Financave, Hekuran Murati. Më la shumë përshtypje një mashtrim skandaloz që e bënë me qytetarët e Kosovës, ministri Hekuran Murati. Në këtë konferencë, ai kërkonte që sektori privat t’i rrisin pagat për punëtorët sepse u është rritur fitimi. E, është vetë personi përgjegjës që e ka në dorë, me një rishikim buxhetor, me një ndërrim të një neni, ta rrisë koeficientin nga 105 në 129 euro, siç kemi rekomanduar si AAK dhe me i rritë pagat në sektorin publik për 80 mijë njerëz”, shkroi ai.
“Pra, e ka në dorë vendimin për t’i rritur pagat në sektorin publik, e kërkon një gjë të tillë nga sektori privat që s’ka bërë asgjë për ta. Kjo është një qeveri, është një ministër i Financave që nuk ka bërë asgjë për sektorin privat, për biznesin, për ekonominë, veçse ua ka rënduar jetesën, e veçse u ka qëndruar mbi kokë tash e dy vjet e gjysmë. Paramendoni ku jemi”, shtoi më tej Tahiri.