Shefi i grupit parlamentar të Partisë Demokratike të Kosovës,(PDK), Abelard Tahiri, ka kërkuar që në seancën e radhës të tërhiqet nga rendi i ditës ligji për pagën minimale.
Tahiri pas përfundimit të mbledhjes së Kryesisë së Kuvendit, e ku u vendos që nesër të mbahet seanca e radhës, ka thënë se është e papranuar që në 23-vjetorin e çlirimit të Kosovës, kategoria e veteranëve të luftës të mbetet jashtë këtij ligji.
“Javën e kaluar ka qenë përcaktimi i pagës minimale, dhe ne si PDK kemi kërkuar që të largohet një pikë e rendit të ditës që i diskriminon Veteranët e luftës”, ka thënë Tahiri.
Sipas Tahirit, ky ligj është një dëm i madh që i bëhet themeleve të lirisë së vendit.
Sipas tij, përcaktimi i pagës minimale është minimumi i të ardhurave, dhe siç thotë ai, me këtë pagë minimale nuk mund të kalohet as muaji.
“Kjo pagë është e pamjaftueshme, me një pagë minimale, nuk mund të lihet jashtë një kategori siç janë veteranët”, ka shtuar Tahiri.
Ai ka thënë se Qeveria po e refuzon reduktimin e akcizës për naftë dhe TVSH-në në produkte esenciale.
“Qeveria po jeton në realitet të mbyllur, po i detyron qytetarët të largohen nga vendi”, ka thënë ai.
Edhe Besnik Tahiri, nga Aleanca për Ardhmërinë e Kosovës(AAK), ka thënë që ligji për pagën minimale të largohet nga rendi i ditës.
Sipas tij, ky ligj është diskriminues, totalisht i pamatur, dhe në esencë e dëmton një kategori të nderuar të vendit, e që janë veteranët.
Ndërsa, sa i përket çështjes së Trustit, ai ka thënë se është një gjendje kaotike në të cilën do të duhej të reflektonte Qeveria.
“Mungesa e vizionit të Qeverisë për të sjellë ligje që ndikojnë drejtpërdrejt te qytetarët, Qeveria po e lë në sirtar ligjin për paga dhe për Trustin”, ka thënë Tahiri.
Ndërsa, edhe Arben Gashi, nga Lidhja Demokratike e Kosovës,(LDK), ka thënë se pjesë e kërkesave që të jenë në rend dite ishte edhe supsendimi i TVSH-së për tre muaj me mundësi vazhdimi për produktet esenciale, përfshirë naftën.
Tjetra kishte të bënte me shqyrtimin edhe çështjen e propozimit për grupin parlamentar të LDK-së që të shkarkohet zyra e Rregullatorit të Energjisë Elektrike për keqmenaxhimin e krizës elektrike.
Ai ka thënë se nga gushti i vitit të kaluar, Komisioni për Ndihmë Shtetërore nuk është funksional, e tani as nuk ekziston fare.
Ndër të tjera, ai përmend se ky komision është kërkesë nga institucionet e BE-së dhe njëherësh, edhe një detyrim ligjor për institucionet e Kosovës.
Gashi ka bërë thirrje për vitalizimin e këtij komisioni, mirëpo thotë që kërkesat e tij nuk kanë hasur akoma në përgjigje.