Shefi i Grupit Parlamentar nga Aleanca për Ardhmërinë e Kosovës (AAK), Besnik Tahiri, ka thënë se mbështetja në këtë moment nga ana e Shteteve të Bashkuara të Amerikës, sa i përket çështjes së dialogut, është e madhe.
Sipas Tahirit, Kosova nuk ka kohë për të humbur dhe duhet të angazhohet më shumë për arritjen e një marrëveshjeje Kosovë-Serbi.
“Në konferencën e sotme për media theksova se e shohim shumë të rëndësishme të informojmë opinionin publik, se Shtetet e Bashkuara të Amerikës nuk kane qenë asnjëherë më të angazhuara në mbështetje të Republikës të Kosovës, në mbeshtetje te dialogut, në shërbim të arritjes së marrëveshjes përfundimtare me Serbinë për njohje reciproke, dhe në rrugën tonë integruese dhe në Partneritetin për Paqe. Roli i ShBA-së është jetik dhe angazhimi është konkret, sikurse që është detyrë shtetërore prej secilit prej nesh që të jemi konstruktiv në realizimin e interesave tona shtetërore dhe të sinqertë në marrëdhënien miqësore që kemi kultivuar tash e sa vite”, ka shkruar Tahiri në llogarinë e tij në Facebook.
Ai ka theksuar se qëndrimi i AAK-së karshi planit franko-gjerman është i pandryshueshëm, dhe, sipas kësaj partie, plani paraqet bazë për shtyerjen e proceseve dhe arritjen e një marrëveshjeje.
“Roli i Aleancës edhe tash, por edhe gjatë qëndrimit në Amerikë, ka qenë konstruktiv, i ndershëm e transparent. Koha është tani! Kosova nuk ka kohë për të humbur. Sa i përket planit Franko – Gjerman – qëndrimi i AAK-së ka qenë konsistent, nuk kemi ndryshuar dhe vazhdojmë të besojmë se ky plan i mbështetur nga ShBA-të është bazë e mirë për shtyrjen e proceseve përpara dhe arritjen e marrëveshjes”, ka vijuar ai.
Ndërsa, është shprehur se avancimi i Kosovës lidhet me kontributin dhe sakrificën e UÇK-së, popullit të saj dhe Amerikën.