“Në këto rrethana ku jemi, edhe disa orë para përfundimit të afatit për zgjedhjen e presidentit, nuk kemi asnjë emër përveç emrave që ka propozuar Lëvizja Vetëvendosje dhe që nuk janë kandidatë unifikues”, deklaroi shefi i grupit parlamentar të AAK-së Besnik Tahiri para mediave.
Sipas tij, AAK nuk është ftuar në këto diskutime dhe nuk do të marrë pjesë në procese që i konsideron si performancë publike pa dialog real.
“AAK nuk ka qenë e ftuar në këto diskutime. Ne nuk marrim pjesë në një diskutim ku është vetëm performancë publike, një diskutim ku flitet vetë me veti. Është vazhdim i një spektakli publik politik që po e çon vendin në zgjedhje. Nuk marrim pjesë në këtë dhe e shohim këtë veprim vetëm si një seancë për të folur vetë me veti”, u shpreh ai.
Tahiri shtoi se është e papranueshme që Kosova të arrijë në një situatë të tillë pa emra unifikues për postin e presidentit.
“Në mënyrën më të sinqertë të mundshme, që vjen Kosova në këtë ditë dhe nuk mund t’i gjejë disa emra unifikues, nuk e kisha besuar”, tha Tahiri.