Ish-ministri, Mahir Yagcilar, vizitën e kryeministrit të Kosovës, Albin Kurti, në Turqi e ka cilësuar vizitë të rëndësishme.
Në një lidhje direkte në emisionin “FIVE”, Yagcilar ka thënë se kjo vizitë është e rëndësisë së veçantë për Kosovën, pasi siç thotë ai, Turqia ka një autoritet të rëndësishëm edhe në NATO, por është shtet i fuqishëm edhe në fushën e mbrojtjes dhe të investimeve.
“Vizita e Kurtit ka një rëndësi të veçantë për Kosovën, Turqia është shtet me një fuqi në aleancën e NATO-s, ka një autoritet të rëndësishëm, shtet i rëndësishëm edhe për regjionin edhe në fushën e mbrojtjes, investimeve”, ka deklaruar Yagcilar.
Sipas tij, vizitat e tilla duhet të shpeshtohen, në mënyrë që bashkëpunimi të thellohet si në fushën e mbrojtjes, ashtu edhe në fushën e ekonomisë.
“Armatimi përmes dronëve, në fushën e mbrojtjes civile dhe ushtarake, të pajiset Kosova me këto është e rëndësishme, të zhvillohen takime më të shpeshta që të thellohet bashkëpunimi”, ka vijuar ai.
Sot, kryeministri i Kosovës, Albin Kurti, është pritur në Ankara të Turqisë, nga presidenti i këtij shteti, Rexhep Taip Erdogan.
Siç njofton Kurti, me presidentin turk kanë biseduar për mundësitë e reja bashkëpunuese në fushën ekonomike dhe atë të mbrojtjes.
“Sot u mirëprita në Ankara nga Presidenti Erdogan Diskutuam marrëdhëniet dypalëshe dhe mundësitë e reja për bashkëpunim ekonomik dhe në fushën mbrojtjes. Të hënën do të mbahet forumi i parë ekonomik për bizneset nga Kosova dhe Turqia, duke ofruar një shans për thellimin e lidhjeve dhe nxitjen e investimeve”, ka thënë Kurti.