Zyra për Informim e Lidhjes Demokratike të Kosovës ka njoftuar të martën e 28 qershorit se kryetari i LDK-së, Lumir Abdixhiku ka pritur të martën përfaqësuesin special të Bashkimit Evropian për Dialogun Kosovë-Serbi dhe për çështje të tjera rajonale të Ballkanit Perëndimor, Miroslav Lajçak.

Në njoftimin e Zyrës për Informim thuhet se gjatë takimit, Abdixhiku dhe Lajçak diskutuan për gjendjen e përgjithshme politike në vend, ndërsa temë e veqantë e diskutimit ishte procesi i dialogut Kosovë-Serbi.

Abdixhiku ia theksoi synimin e LDK-së Lajçakut se procesi i dialogut duhet të përfundojë me njohje reciproke dhe normalizim të plotë të marrëdhënieve mes dy vendeve.

Pamje të takimit në mes të Abdixhikut dhe Lajçakut

“Kryetari Abdixhiku, ndër të tjera, tha se LDK mbetet partnere kredibile e miqve ndërkombëtarë në të gjitha proceset e rëndësishme dhe integruese të vendit”, thuhet në njoftim.

Në fund të takimit, kryetari i LDK-së ka kërkuar përshpejtimin e procesit të liberalizimit të vizave, e cila u adresua në Rezolutën e EPP-së që u votua në fillim të qershorit.