Jens Plettner dhe Emmanuel Beaune, dy këshilltarët e emëruar nga Gjermania dhe Franca për dialogun Kosovë-Serbi, do të vizitojnë Kosovën të premten së bashku me të dërguarin e posaçëm të Bashkimit Evropian për dialogun, Miroslav Lajçak.

Lajmin për RTV Dukagjini e kishte konfirmuar zëdhënësi i BE-së, Peter Stano, i cili ka theksuar se qëllimi i kësaj vizite është “të eksplorohen opsionet për përparimin në dialog”.

Stano ka thënë se përpos  takimit me kryeministrin e Kosovës, një takim i ndarë është planifikuar edhe me presidentin e Serbisë, Aleksandër Vuçiq.

“Gjatë vizitës janë të planifikuara takime të ndara me kryeministrin e Kosovës, Albin Kurti dhe presidentin e Serbisë, Aleksandër Vuçiq”, konfirmoi Stano.

Para pak ditësh, Presidenti i Serbisë, Aleksandër Vuçiq, ka pranuar një letër të përbashkët nga Presidenti i Francës, Emmanuel Macron dhe kancelari gjerman, Olaf Scholz.

Bazuar në letër bëhet e ditur se dy këshilltarëve për politikën e jashtme dhe të sigurisë, Jens Plettner dhe Emmanuel Beaune u është dhënë detyra e të ofruarit mbështetje Lajçak-ut në përpjekjet e tij në përparimin e dialogut Kosovë-Serbi.

Tashmë, Kosova dhe Serbia kanë arritur marrëveshje për lëvizjen e lirë të qytetarëve duke larguar dokumentet hyrëse-dalëse.

Ndërkaq, më 1 shtator të këtij viti, Qeveria e Kosovës ka nisur zbatimin e vendimit të saj për riregjistrimin e targave të makinave në RKS.

Lajçak sërish viziton Kosovën dhe Serbinë