Gjatë kësaj të diele, në vend do të mbajë mot kryesisht i vranët e që do të përcillet me shi.
Parashihet që të ketë edhe shkarkime rrufesh.
Sipas Institutit Hidrometeorologjik të Kosovës, temperaturat minimale do të lëvizin ndërmjet 12 dhe 16 gradë Celsius, ndërsa maksimalet e ditës parashihen të lëvizin ndërmjet 21 dhe 28 gradë Celsius.
Do të fryjë erë, kryesisht nga veriperendimi, e lehtë dhe lokalisht e fortë.
Derisa kujtojmë që gjatë ditës së djeshme në kryeqytet kishte ndodhur një stuhi e fortë, për të cilën kishte njoftuar edhe Instituti Hidrometeorologjik i Kosovës (IHMK).
Pas kësaj që ndodhi, Kompania Kosovare për Distribuim me Energji Elektrike (KEDS) njoftoi se në një pjesë të madhe të Kosovës, një numër i caktuar i daljeve ishin jashtë funksionit.
“Si pasojë e këtij moti, i përcjellur me shi e erëra të forta, rajonet më të prekura në rrjetin elektroenergjetik janë Gjakova, Prizreni, Ferizaj, si dhe një pjesë e Pejës dhe Prishtinës”, njoftoi KEDS.
Ndryshe kjo stuhi kishte shkaktuar thyerjen e pemëve në Aeroportin Ndërkombëtar të Prishtinës “Adem Jashari”.
Dukagjini ka siguruar pamja nga aeroporti.
Lishur me këtë situatë, kryetari i Prishtinës Përparim Rama, kishte bërë të ditur se ekipet kompetente ishin në terren për të sanuar dëmet e shkaktuara nga stuhia e shiut në kryeqytet.
Gjithashtu, Rama kishte njoftuar se është larguar lisi i rrëzuar nga rruga “Luan Haradinaj” dhe është pastruar zona.
“Ju informojmë se jemi të angazhuar maksimalisht me të gjitha ekipet tona në terren për të sanuar dëmet e shkaktuara nga stuhia e shiut. Reagimi i ekipeve tona në terren bashkë me zjarrfikësit ka qenë i menjëhershëm, kemi larguar lisin e rrëzuar nga rruga “Luan Haradinaj” dhe e kemi pastruar zonën. Faleminderojmë punëtorët nga @Hortikultura për reagimin e shpejt!”, shkroi Rama.