Të hënën e dymbëdhjetë shtatorit do të mbahet mbledhja e radhës së Kryesisë së Kuvendit të Kosovës. Mbledhja do të mbahet në orën 11:00, ndërsa rendi i ditës do të përfshijë fillimisht miratimin e procesverbalit të mbledhjes së mëparshme të Kryesisë së Kuvendit.
Pika e papërfunduar nga Seanca plenare, e mbajtur më 22, 23, 24 shkurt, 16 mars, 14 prill dhe 22 qershor 2022, e cila ka në fokus votimin në parim të Projektligjit nr.08/L-104 për ndryshimin dhe plotësimin e ligjit nr.03/L-040 për vetëqeverisjen lokale.
Në rendin e ditës do të jetë dhe pika e papërfunduar nga Seanca plenare, e mbajtur më 24, 25 shkurt, 16 mars, 14 prill dhe 22 qershor 2022, e cila ka në fokus shqyrtimin e parë të Projektligjit nr. 08/L-023 për ndryshimin dhe plotësimin e Ligjit nr. 03/L-064 për Festat Zyrtare në Republikën e Kosovës.
Në mbledhjen e Kryesisë së Kuvendit të Kosovës do të diskutohet pika e papërfunduar nga Seanca plenare, e mbajtur më 7, 14 prill dhe 22 qershor 2022, e cila ka në fokus zgjedhjen e një anëtari të Bordit të Radiotelevizionit të Kosovës, nga radha e komunitetit serb.
Ndërsa tek pikat e papërfunduara nga Seanca plenare, e cila është mbajtur më 4 gusht 2022do të jetë në fokus: votimi në lexim të dytë i Projektligjit nr.08/L-117 për Qeverinë e Republikës së Kosovës, votimi në parim i Projektligjit nr.08/L-149 për ndryshimin dhe plotësimin e Ligjit nr.06/L-010 për noterinë, shqyrtimi i Strategjisë së Sigurisë së Kosovës 2022-2027.
Po ashtu do të diskutohet dhe zgjedhja e një anëtari të Bordit të Radiotelevizionit të Kosovës, nga komuniteti shqiptar, shqyrtimi i rekomandimeve të dala nga shqyrtimi i Raportit të Auditimit për pasqyrat financiare vjetore të Radiotelevizionit të Kosovës për vitin 2021. Do të diskutohen dhe rekomandimet e dala nha shqyrtimi i Raportit të Auditimit të performancës “Menaxhimi i fondeve publike në Radiotelevizionin e Kosovës”.
Ndërsa, tek pikat e papërfunduara nga Seanca plenare, e cila është mbajtur më 4 gusht do të diskutohet dhe formimi i Komisionit Ad-Hoc për përzgjedhjen e kandidatëve për një anëtar të Komisionit të Pavarur të Mediave.