E mërkura e shëndetit mendor në Radio Dukagjini, sonte u fokusua tek kërkimi me kohë i ndihmës tek ekspertët e shëndetit mendor.
E ftuar për të diskutuar për këtë në kuadër të emisionit “Jeto” me Xheneta Asllanin, ishte psikologia Atifete Syla.
Psikologia deklaroi se tek ne, ekspertët e shëndetit mendor vizitohen shumë rrallë, edhe në rastet kur kemi të bëjmë me çrregullime të shëndetit mendor, pasi njerëzit që kërkojnë ndihmë stigmatizohen. Sipas saj, shumë nga ne as nuk e dijmë se çfarë është psikologu. Ai nuk është psikiatër, sipas Sylës psikologu ndihmon edhe në parandalimin e shfaqjes së çrregullimeve më të mëdha në rast se kërkohet ndihma e tij kur kemi probleme më të vogla.
Syla deklaroi se psikologu mund të na ndihmojë në modifikimin e sjelljes ose të mendimeve. Këto të fundit përmes ndikimit në gjendjen emocionale, shkaktojnë edhe ndryshimin e sjelljeve. Nëse mendimet janë negative, gjendja jonë emocionale dhe si rrjedhojë edhe sjelljet do të jenë negative. Psikologu ka për detyrë t’i ndryshojë këto sjellje negative të personit në pozitive, e kësisoj duke ndërruar edhe gjendjen emocionale dhe sjelljet e tij.
Nëse personi me mendime negative nuk kërkon ndihmë me kohë, këto mendime shëndërrohen në bindje, e bindjet sipas psikologes janë shumë vështirë të hiqen, duke mbetur peng i bindjeve të gabuara gjatë gjithë jetës, e që mund të sjellë me kohë edhe probleme serioze të shëndetit mendor.