Vështirë mund të gjendet një tjetër 8 vjeçar në botë, që mund të ketë përjetuar diçka të ngjashme me atë që ka përjetuar Gramos Berisha.
Ai është një prej të mbijetuarve nga masakra prej më të rëndave në Kosovë, e kryer 25 vjet më parë ku ushtria serbe vrau në gjakftohtësi 49 anëtarë të familjes Berisha nga Suhareka.
Ai bashkë me nënë e tij dhe gruan e axhës, kishin kërcyer nga një kamion që po i bartte ata drejt një varreze masive, për ta treguar kështu historinë që nuk është e lehtë ta tregosh.
“Kamioni u nis në drejtim të Prizrenit më të gjithë trupat dhe rrugës, mami me ka thirr ka pas qef me ma pa ftyrën edhe ni herë dhe kur me ka pa që jam gjallë tha hajde me mamin kërcejmë prej kamionit dhe para neve ka kërcy nga kamionin gruaja e axhës”, tha Gramoz Berisha- I mbijetuar i masakrës.
Ai tregon nga kamioni i cili kishin kërcyer, kishin dëgjuar edhe të tjerë familjarë që kishin folur por e kishin të pamundur t’i shpëtonin.
Prej 49 anëtarëve të familjes, 20 prej tyre janë ende të pagjetur, me gjurmë e krimit makabër që u ruhen ende brenda një lokali të shndërruar në muze, të cilin, tani Gramos Berisha që është Zëvendëskonsull në Konsulatën e Kosovës në Stutgart të Gjermanisë, e viziton shpesh.
Kërkimi për të tjerë anëtarë të familjes, vazhdon.
Trupat e të vrarëve të familjes Berisha, ishin gjetur në varrezën masive në Batajnicë të Serbisë, një prej varrezave masive ku ishte tentuar të fshiheshin krimet e kryera nga Serbia në Kosovë.