Të paktën 13 persona janë vrarë dhe rreth 40 të tjerë janë plagosur nga sulmet e fundit ruse ndaj kryeqytetit ukrainas, Kiev, ka njoftuar kryeministri i Ukrainës.
Shërbimi Shtetëror i Emergjencave të Ukrainës bëri të ditur se gjatë natës janë goditur ndërtesa banimi dhe depo në zona të ndryshme të qytetit. Nga sulmet janë dëmtuar edhe një spital për fëmijë dhe një shkollë.
Presidenti ukrainas, Volodymyr Zelensky, tha se numri i viktimave lidhet edhe me mungesën e raketave për mbrojtjen ajrore, të cilat Ukraina i siguron kryesisht nga aleatët perëndimorë.
Deputeti ukrainas Oleksiy Goncharenko tha për BBC-në se Ukraina është “absolutisht e pambrojtur” ndaj sulmeve me raketa balistike dhe se nuk mund të bëjë shumë pa raketat për interceptim.
“Rusia po e përdor këtë për të shkatërruar sa më shumë infrastrukturë që të jetë e mundur. Për ne është shumë e dhimbshme, sepse njerëzit po vdesin këtu çdo ditë pa këto interceptues”, tha ai.
Zelensky, përmes një postimi në Telegram, tha se përderisa Ukraina nuk ka mjaftueshëm sisteme për të penguar raketat balistike, Rusia nuk do ta marrë seriozisht mundësinë e paqes.
“Interceptuesit për Patriotët ende nuk janë zëvendësuar dhe ata nevojiten çdo ditë. Çdo raketë shtesë shpëton jetën e njerëzve tanë”, shkroi Zelensky.
Një përditësim i publikuar nga Forcat Ajrore të Ukrainës të enjten në mëngjes sugjeroi se asnjë nga raketat balistike ruse të përdorura gjatë natës nuk ishte rrëzuar.
Ministria ruse e Mbrojtjes tha se gjatë sulmeve janë përdorur armë të lëshuara nga ajri, toka dhe deti, me objektiv objekte ushtarake dhe depo.
Ukraina është mbështetur në raketat amerikane interceptuese Patriot për t’u mbrojtur nga raketat balistike ruse. Megjithatë, Shtetet e Bashkuara kanë përdorur një pjesë të konsiderueshme të rezervave të tyre gjatë luftës në Lindjen e Mesme dhe kanë reduktuar furnizimet për Ukrainën.
Thirrja e re e Zelenskyt për ndihmë ushtarake vjen në një moment kur ai po përballet edhe me sfida të brendshme politike. Ish-ministri i Mbrojtjes, Mykhailo Fedorov, një figurë e njohur në vend, ka kërkuar mbajtjen e zgjedhjeve dhe ka kritikuar ashpër qeverinë, duke pretenduar se korrupsioni ka privuar ushtrinë nga armët.
Sulmet ndaj Kievit nisën rreth mesnatës, pasi në të gjithë qytetin u aktivizuan sirenat e alarmit ajror. Më pas, në kryeqytet u dëgjuan goditje nga rreth 20 raketa ruse.
Sulmet shkaktuan ndërprerje të energjisë elektrike për mijëra objekte, duke lënë në errësirë pjesë të rajonit të Kievit.
Për personat e vrarë në sulmet e natës është shpallur ditë zie, raporton BBC.