Të paktën 20 të burgosur në një burg sirian, që besohet të jenë xhihadistë, janë arratisur pasi tërmeti dëmtoi objektin.
Siç raporton AFP-ja, burgu në qytetin Rajo, pranë kufirit turk mban rreth dy mijë të burgosur, me rreth një mijë e 300 prej tyre të dyshuar si luftëtarë të IS-it, ka thënë një zyrtar në burg.
Ky burg mban gjithashtu luftëtarë nga forcat e udhëhequra nga kurdët, shkruan BBC.
Tërmeti i së hënës në Turqi me magnitudë 7.8 i cili u pasua me dhjetëra pasgoditje në rajon, shkaktoi dëme duke përfshirë çarje të mureve dhe dyerve.
“Të burgosurit filluan kryengritje dhe morën kontrollin e pjesëve të burgut. Rreth 20 të burgosur u larguan, ata besohet se janë militantë të Shtetit Islamik”, ka thënë një burim.
Ekipet e shpëtimit kanë vazhduar punimet edhe të martën për të gjetur të mbijetuar në rrënojat e mijëra ndërtesave të rrëzuara nga një tërmet me magnitudë 7.8 dhe pasgoditje të shumta që goditën Turqinë lindore dhe Sirinë fqinje, me zbulimin e më shumë trupave duke e çuar numrin e të vdekurve në më shumë se 5 mijë.
Vendet në të gjithë botën kanë dërguar ekipe për të ndihmuar në përpjekjet e shpëtimit dhe agjencia e menaxhimit të fatkeqësive të Turqisë ka thënë se më shumë se 24 mijë e 400 personel emergjence ishin tani në terren.
Por me një zonë kaq të gjerë territori të goditur nga tërmeti i së hënës dhe gati 6 mijë ndërtesa të konfirmuara se janë shembur vetëm në Turqi, përpjekjet e tyre u shpërndanë paksa.
Përpjekjet për të arritur të mbijetuarit janë penguar dhe nga temperaturat nën zero dhe afër 200 lëkundjet e pasme, të cilat e bënë të rrezikshëm kërkimin nëpër struktura të paqëndrueshme.