Policia e Kosovës ka njoftuar se gjatë ditës së hënë në kuadër të aksioneve për parandalimin e të shtënave në ahengje, në dy lokacione në qytetin e Mitrovicës janë konfiskuar tri armë të llojit pistoletë dhe janë arrestuar dy persona.
Personat e dyshuar, pas intervistimit janë liruar në procedurë të rregullt, ndaj tyre janë iniciuar raste për veprën penale ‘përdorim i armës’ dhe ‘mbajtje në pronësi, kontroll të paautorizuar të armës’.
Ndërkaq armët dyshohet se janë përdorur gjatë dy ahengjeve familjare në këtë komunë.
“Informacione për të shtëna ishin raportuar në rrugën e “Ulqinit” dhe në rrugën “Hekurudha” në Mitrovicë, ku si rezultat i reagimit të shpejtë të njësive policore ka rezultuar që në dy lokacionet të konfiskohen tri armë të llojit pistoleta, të cilat dyshohet se janë përdorur në ahengje familjare”, thuhet në njoftimin e policisë.
Policia e Kosovës u ka bërë thirrje qytetarëve që të mos i përdorin armët në ahengje. Në njoftim thuhet edhe se policia do të ndërmarrë të gjitha veprimet përfshirë bastisjen e lokacioneve ku dyshohet se janë përdorur armët.