Një incident me armë zjarri është raportuar të mërkuren mbrëma në Kaçanik, ku dyshohet se ka pasur shkëmbim zjarri mes dy veturave.
Sipas Policisë së Kosovës, rreth orës 20:15 është pranuar informata për të shtëna me armë zjarri.
Njësitet policore kanë dalë menjëherë në vendin e ngjarjes, por fillimisht nuk janë hasur dëshmi.
Pas veprimeve hetimore, rreth orës 21:40 është gjetur një veturë e braktisur dhe e vetaksidentuar, në të cilën janë vërejtur vrima që dyshohet se janë shkaktuar nga arma e zjarrit.
Lidhur me rastin është arrestuar një dëshmitare, grua kosovare, e cila ka deklaruar se i dashuri i saj, i dyshuari burrë kosovar, kishte shtënë me armë zjarri në drejtim të disa shtëpive të panjohura dhe se aksidentalisht kishte plagosur veten.
Gjatë kërkimit të të dyshuarit, njësitet policore e kanë vërejtur atë mbi kulmin e shtëpisë së tij.
Pas negociatave të zhvilluara nga eprori policor, i dyshuari është bindur të zbresë dhe është arrestuar.
Me vendim të prokurorit, i dyshuari është dërguar në mbajtje, ndërsa arma e zjarrit e tipit AK-47, që dyshohet se është përdorur në rast, është konfiskuar.
Po ashtu, në konsultim me prokurorin, edhe dëshmitarja është dërguar në mbajtje, nën dyshimin se ka dhënë deklaratë të rreme.