Gazetarët Gresa Nitaj (Klan Kosova), Leonita Bajrami (Top Channel) dhe Venhar Isufi (Tëvë1), janë penguar teksa po raportonin për vrasjen që ndodhi të martën mbrëma në Vranjevc të Prishtinës.
Për këtë ka reaguar Asociacioni i Gazetarëve të Kosovës, të cilët kanë kërkuar nga Policia e Kosovës që në situata të tilla të krijojnë kushte të favorshme për gazetarët.
“Në një lidhje të drejtpërdrejtë të gazetares Gresa Nitaj në një edicion informativ në Klan Kosova, shihet një burrë duke e kapur për krahu gazetaren, e duke mos e lënë të raportojë atë, si dhe duke i kërkuar të largohen edhe ekipet e Top Channel dhe Tëvë1.
Për Asociacionin e Gazetarëve të Kosovës, pengimi i punës së gazetarëve është i papranueshëm, andaj i bëjmë thirrje Policisë së Kosovës, që në situata të tilla të krijojë kushte të favorshme për gazetarët që të kryejnë punën e tyre, pa u cenuar e penguar”, thuhet në reagimin e AGK-së.