Deputetët e Kuvendit të Kosovës do të mblidhen në një seancë të veçantë të premten e dy qershorit, për të diskutuar lidhur me situatën në veri të vendit.
Kështu është bërë e ditur në një njoftim në web-faqen e Kuvendit, ku bëhet e ditur se debati parlamentar do të nisë nga ora 10:00.
Ndryshe, shefi i Grupit Parlamentar të Partisë Demokratike të Kosovës, Abelard Tahiri, ka thënë se karshi situatës në veri nuk duhet të qëndrohet duarkryq, duke kritikuar qeverinë aktuale për dëmet që sipas tij po ia shkakton vendit.
Pas mbledhjes së Kryesisë së Kuvendit, Tahiri ka thënë se është e papranueshme dhe e dhimbshme që Kosova të përjashtohet në fillimet e saja nga angazhimi ushtarak si “Defender Europe”.
“Si vend, agjenda jonë ndërkombëtare është dëmtuar jashtëzakonisht shumë dhe raportimet e fundit dhe nga mediat edhe nga ambasadori i SHBA-së për pozicionin që ka marrë karshi Kosovës janë shqetësuese dhe të dëmshme”.
Si grupe parlamentare, ai ka thënë se kanë kërkuar nga kryeministri i Kosovës, Albin Kurti, që sapo të kthehet nga Konferenca e Sigurisë Globale që po mbahet në Bratisllavë, të raportojë mbi zhvillimet dhe mbi atë se çka do të ndërmarrë.
“Si PDK jemi të shqetësuar mbi krejt zhvillimet që lidhen edhe me sanksionet e vendosura nga SHBA-të”.