Presidentja e Kosovës, Vjosa Osmani, e ka shpallur të mërkurën e 8 shkurtit ditë zie në Kosovë, në shenjë kujtimi dhe nderimi ndaj viktimave dhe të lënduarve nga tërmetet që ndodhën të martën në Turqi.
“Teksa kujtojmë viktimat, nderojmë trimërinë dhe qëndresën e atyre që po bëjnë të pamundurën për shpëtimin e çdo jete nën rrënoja”, ka shkruar Osmani në llogarinë e saj në Facebook.
Osmani një vendim të tillë e ka marrë në shenjë respekti shtetëror e qytetar dhe në përputhje me kompetencat ksuhtetuese e ligjore.
“Përballë tragjedive të tilla duhet të qëndrojmë pranë atyre që kanë nevojë për mbështetje. Dhimbja e popullit turk dhe atij të Sirisë është edhe e jona. Prandaj, bazuar në kompetencat kushtetuese e ligjore, në shenjë respekti shtetëror e qytetar, ditën e mërkurë, 8 shkurt 2023 e kam shpallur Ditë Zie Shtetërore në Republikën e Kosovës, pas tërmeteve të datës 6 shkurt 2023 me epiqendër në Turqi, i cili la mijëra të vdekur e të lënduar”, ka shtuar Osmani.
Po ashtu, ka theksuar se ushtarakët e Kosovës janë në Turqi dhe të gatshëm për të mbështetur dhe ndihmuar qytetarët.
“Mendimet dhe lutjet tona sot, sikurse edhe dje janë për viktimat, të lënduarit dhe të gjithë të prekurit nga ky tërmet e solidarizimi ynë është i plotë. Ushtarakët tanë tashmë gjinden në Turqi ndërkaq Kosova është në dispozicion të plotë të vazhdojë mbështetjen”, ka shtuar Osmani.
Osmani ndër të tjera, ka theksuar se një tragjedi e tillë që e ka përfshirë Turqinë e prek edhe Kosovën.
“Më shumë se 5 mijë viktima janë konfirmuar të vdekur nga tërmeti në Turqi e Siri, ndërkaq mijëra të tjerë janë akoma nën rrënoja. Një tragjedi e përmasave shkatërrimtare që ka shkaktuar trishtim e dhimbje kudo në botë, përfshirë në Kosovë. Dhimbje pafund për viktimat e për ata që përjetuan tmerrin e humbën më të dashurit por edhe shpresë për ata që ende ndodhen nën rrënoja”, ka vijuar Osmani.
448
Lajmi në përditësim…