Qeveria turke ka bërë të ditur se më shumë se 600 njerëz po hetohen tani në Turqi për ndërtesat që u shembën nga tërmeti vdekjeprurës i 6 shkurtit.
Të shtunën, ministri i Drejtësisë, Bekir Bozdag, ka thënë se 184 të dyshuar – përfshirë kontraktorët e ndërtimit dhe pronarët e pronave – ishin arrestuar tashmë.
Për vite me radhë, ekspertët paralajmëruan se korrupsioni endemik dhe politikat e qeverisë nënkuptonin se shumë ndërtesa të reja ishin të pasigurta.
Numri i konfirmuar i vdekjeve në Turqi dhe Siri tani ka shkuar mbi 50 mijë, raporton BBC.
Bozdag i bëri komentet televizive nga Turqia juglindore, ku goditi tërmeti me magnitudë 7.8 ballë dhe u pasua nga një tjetër lëkundje e fuqishme vetëm disa orë më vonë.
Komentet e tij treguan se si ishte zgjeruar hetimi – dy javë më parë, autoritetet thanë se ishin lëshuar 113 urdhërarreste.
Partitë e opozitës dhe disa ekspertë ndërtimi akuzojnë administratën e presidentit, Recep Tayyip Erdogan, për dështim në zbatimin e rregulloreve të ndërtimit dhe përpjekje për të larguar fajin e përgjithshëm për katastrofën.
Ata thonë se politikat e qeverisë kanë lejuar të ashtuquajturat amnisti për kontraktorët që kanë shkelur rregullat e ndërtimit, në mënyrë që të inkurajojnë një bum ndërtimi, duke përfshirë rajonet e prirura nga tërmeti.
Erdogan ka pranuar mangësitë, por duket se fajëson fatin për shkallën e katastrofës.
“Gjëra të tilla kanë ndodhur gjithmonë. Është pjesë e planit të fatit”, ka thënë ai gjatë një vizite të fundit në rajon.
Ndryshe, tërmeti tragjik i gjashtë shkurtit në Turqi e Siri deri më tani ka lënë mbi 50 mijë të vdekur.