Ora 09:00 e mëngjesit, fshati Burojë, Skenderaj.
Vetura e bardhë pozicionohet në breg, dy persona i afrohen varrezave të fshatit.
Mbi varrin e Haxhi Thaçit po e lirojnë vendin për një kurorë të veçantë.
Njërën kurorë ia dërgoi nga distanca ndërsa, sot djali do t’ia vendosë me duart e tij.
I gjithë fshati ishte në dijeni që Hashim Thaçi po vjen, por të gjithë rrudhnin krahët.
Aeroplani u nis.
“Aplikacioni flight-radar tregon se aeroplani i nisur nga Roterdami i Holandës, sapo kaloi mbi qiellin e Kosovës, saktësisht mbi fshatin Burojë. Ne mund ta dëgjojmë zhurmën e aeroplanit, por as me sy të lirë e as me kamerë nuk mund ta regjistrojmë.”
Aeroplani privat rreth orës 10:00 zbriti në aeroportin e Prishtinës.
Nën masa të rrepta sigurie u nisën për në Burojë. Perimetri i sigurisë ishte i madh.
Për të shmangur turmën një familje u detyrua t’i zhvendosë të pamet tek një shtëpi në fshat.
Specialja kishte kërkuar edhe certifikatë të vdekjes në mënyrë që të sigurohet se nuk po ju ik asgjë.
Ora 11:00, me armë të gjata, vigjilentë, të gatshëm për çdo reagim, ia hapin derën.
Me kurorë në duar niset drejt varrit.
Për herë të fundit e pa dy ditë para se të vdes në spital.
“Te varri yt erdha i fundit, babë. Para meje erdhën mijëra qytetarë. Së shpejti, dorë më dorë, do t’i falenderojë të gjithë! Të qoftë i lehtë dheu i Kosovës!”
Ky është mesazhi i kurorës së dytë.
Qëndrimi stoik e shoqëron Thaçin, po mërzinë nuk mund ta fshehë.
Fiks 15 minuta u soll rreth varrit të babës.
Herë në këmbë, herë ulur, mendueshëm, i heshtur, aty këtu për ta thyer atë qëndrim nga varri heq gurë e lëvizë lule.
Mërzinë dhe heshtjen herë pas herë e ndrydhte me vendosjen e dorës në zemër, për t’iu përgjigjur ngushëllimeve që vinin këndej telit.
Akrepat e orës iu ofruan fundit të vizitës. Një zyrtari policor i kërkon ta dijë sa është ora. Thaçi e kuptoi se për t’u çmallur i kanë mbetur edhe pak minuta.
Vizita e shumëpritur për të përfundoi.
Ashtu në heshtje niset drejt veturës e prap forca e mposht emocionin.
Me grushtin lartë, simbol të triumfit, Thaçi jep përshëndetjen e fundit.
Në shtëpi po e priste nëna Hyra, dhe bashkëshortja Lumnija.
4 vetura të Eulexit dhe dy të Policisë së Kosovës u pozicionuan në hyrje të shtëpisë.
Për të evituar çfarëdo sfidë të sigurisë dhe për ta mbajtur larg mediave me njërën veturë e futën në oborr.
Mbi dy orë e dhjetë minuta u çmall me nënën e bashkëshorten e pas kësaj nën masa të rrepta të sigurisë u largua nga shtëpia ku u rritë.
Përsëri nuk e lëshoi rastin që të përcjellë porosi.
Me gishtin lartë të cilin dikur e kishte kthyer në simbol personal, u largua nga Buroja.
“Në shtëpinë e tij në Burojë mbi dy orë e gjysmë qëndroi me nënën dhe bashkëshorten. Ndërkaq gjatë ditës së nesërme, ish-presidenti Hashim Thaçi në qendrën e mbajtjes në selinë kryesore të Eulexit në Fushë-Kosovë do të takohet me vëllezërit, motrën dhe djalin.”
Vizita humanitare për Thaçin, i akuzuar për krime lufte e krime kundër njerëzimit, është lejuar nga Gjykata Speciale pesë ditë pas vdekjes e tri pas varrimit të babait të tij. Tërthorazi thanë se kjo është bërë për shkak të çështjeve procedurale të Gjykatës.