Një person ka humbur jetën pas një rrahjeje që ka ndodhur në fshatin Zlipotok të Dragashit, mbrëmjen e 29 qershorit.
Sipas raportit 24-orësh të Policisë së Kosovës, ngjarja është regjistruar rreth orës 23:15.
“Është raportuar se ka ndodhur një rrahje në mes disa personave, si pasojë e kësaj viktima mashkull kosovar, dyshohet se ka marrë lëndime nga një mjet i mprehtë”, thuhet në raportin e Policisë.
Viktima është dërguar për trajtim mjekësor në QKMF-në e Dragashit, por nuk ka arritur t’u mbijetojë plagëve.
“I njëjti është dërguar për tretman mjekësor në QKMF-Dragash, ku mjeku kujdestar ka konstatuar vdekjen e viktimës”, njofton Policia.
Lidhur me rastin, autoritetet bëjnë të ditur se i dyshuari është larguar nga vendi i ngjarjes dhe vazhdon të jetë në arrati.
“Ndërsa i dyshuari mashkull kosovar gjendet në arrati”, thuhet në raportin policor.
Rasti është duke u hetuar nga organet kompetente.