TikToku po vendos një kufi ditor të kohës para ekranit prej 60 minutash për përdoruesit që janë nën 18 vjeç.
Nëse të rinjtë kalojnë kufirin e ri, do të duhet të vendosin një kod për të vazhduar përdorimin e shërbimit atë ditë.
Megjithatë, ata do të jenë në gjendje të tërhiqen nga masa e re, për të cilën TikTok thotë se do të zbatohet “në javët e ardhshme”.
Aplikacioni me video, i cili është në pronësi të firmës kineze, ByteDance, ka njoftuar se po prezanton funksionin për t’i ndihmuar njerëzit të “qëndrojnë nën kontroll” të përdorimit të tyre.
TikToku ka theksuar se kufiri i ri vjen pasi solli një kërkesë vitin e kaluar për t’i inkurajuar adoleshentët të menaxhojnë kohën e tyre para ekranit. Kompania ka bërë të ditur se kjo ndihmoi “në rritjen e përdorimit të mjeteve tona të kohës para ekranit me 234%”.
Përdoruesit e platformës duhet të jenë të paktën 13 vjeç dhe, si pjesë e kësaj veçorie të re, kushdo nën moshën 18 vjeç do të marrë një njoftim javor me një “përmbledhje të kohës së tyre para ekranit”.
Nuk ka “sasi të duhur” të kohës
Përdoruesit që i prek kjo rregull do të marrin kodkalimin e tyre të ri të kufirit kohor në një ekran në aplikacionin e tyre teksa ndryshimet hyjnë në fuqi.
Kushdo që tërhiqet nga kufizimi i ri prej 60 minutash, por vazhdon të përdorë aplikacionin për 100 minuta në ditë, do të marrë një kërkesë nga TikToku për t’i vendosur kontrollet e veta të kohës para ekranit.
Prindërit e fëmijëve që përdorin opsionin “Family Pairing” në aplikacion do të jenë gjithashtu në gjendje të caktojnë kufijtë e kohës para ekranit, si dhe të kenë qasje në një panel i cili do të jepte një përmbledhje të përdorimit të aplikacionit.
Cormac Keenan, kreu i besimit dhe sigurisë në TikTok, ka theksuar se kompania kishte punuar me studiues në zhvillimin e kufijve të rinj.
“Ndërsa nuk ka një pozicion të miratuar kolektivisht për sasinë “e duhur” të kohës para ekranit, apo edhe ndikimin e kohës para ekranit më gjerësisht, ne u konsultuam me kërkimin aktual akademik dhe ekspertët nga Laboratori i Wellness Digital në Spitalin e Fëmijëve të Bostonit për të zgjedhur këtë kufi”, ka shpjeguar ai.
Kritikët e aplikacionit me video e mirëpritën kufirin e kohës para ekranit, por e përshkruan atë si “maja e ajsbergut” kur bëhet fjalë për përgjigjen e TikTokut ndaj ekspozimit të përdoruesve të rinj ndaj platformës.
“Kokaina e algoritmeve”
Imran Ahmed, është shef ekzekutiv i Qendrës për Kundër urrejtjes Digjitale, e cila kohët e fundit publikoi një studim që tregon se algoritmi i TikTokut “bombardon” adoleshentët me përmbajtje të dëmshme.
“TikTok ka fituar garën për zemrat dhe mendjet e 14 deri në 24-vjeçarëve në Shtetet e Bashkuara dhe Mbretërinë e Bashkuar”, ka sqaruar ai.
“Është kokaina e algoritmeve. Është ajo që shkakton më së shumti varësi, më e rrezikshmja dhe ajo që duhet trajtuar më urgjentisht”.
Ahmed ka thënë për BBC-në se kërkimi i qendrës së tij në fund të vitit të kaluar ka zbuluar se brenda pak minutash nga hapja e një llogarie në TikTok, një përdoruese, vajzë 13-vjeçare po merrte përmbajtje me çrregullime të të ngrënit dhe lëndim të vetvetes.
Ai i bëri thirrje platformës që t’i përqendrojë përpjekjet e saj jo vetëm në frenimin e kohës para ekranit, por edhe për të “pastruar” prurjet e përmbajtjeve të dëmshme për ta bërë atë një “mjedis të sigurt për fëmijët”.
Kjo vjen pasi TikToku përballet me polemika të ripërtërira mbi marrëdhëniet e tij me qeverinë kineze dhe mbrojtjen e të dhënave të përdoruesve.
Në fillim të kësaj jave, qeveria kanadeze u bë e fundit që ndaloi aplikacionin nga pajisjet qeveritare, pas lëvizjeve të ngjashme në Shtetet e Bashkuara.
Në shtator 2021, TikToku ka njoftuar se kishte arritur më shumë se një miliard përdorues aktivë mujorë, duke e bërë atë një nga faqet më të mëdha sociale në botë.
Ai nuk publikon një ndarje demografike të përdoruesve të tij, por shihet nga tregtarët dhe reklamuesit e mediave sociale si platformë kyçe për të arritur njerëzit nën moshën 34 vjeç.