Filmi i metrazhit të gjatë artistik “Toka brenda meje” me regji nga Fisnik Maxville (Fisnik Maxhuni), do të shfaqet premierë në festivalin e filmit Tallin Black Nights në Estoni.
Tallin Black Nights, është njëri prej festivaleve më të mëdha të filmit në Evropën Veriore, njëherë edhe festivali i kategorisë “A”.
Ky festival do të mbahet përgjatë datave 11 deri më 27 nëntor të këtij viti.
Filmi përcjellë Remon i cili pas vitesh në mërgim kthehet nga Gjeneva në vendlindjen e tij në Kosovë. Dashuria e tij e parë, Una, e thërret për ta informuar për vdekjen e afërt të patriarkut të familjes dhe zhvarrosjen e një varri masiv. Duke u kthyer në fshatin e tij pas një mungese dhjetë vjeçare, Remo do të duhet të përballet me të kaluarën dhe të tashmen e tij.
Filmi ka për producent Valon Bajgorën, Yll Ukën, Britta Rindelaub dhe Thomas Reichlin.
Në rolet kryesore luajnë: Florist Bajgora, Luàna Bajrami, Armend Smajli, Luan Jaha, Arta Mucaj-, Irena Aliu, Kumrije Hoxha, Meli Qena dhe Çun Lajçi.
“Toka brenda meje” është realizuar me mbështetjen e Qendrës Kinematografike të Kosovës (QKK), Federal Office for Culture, Cinéforom, Loterier romande, Media Desk Suisse, Suissimage dhe FOCAL, në bashkprodhim me RTS Radio Télévision Suisse, ka bërë të ditur QKK.