Skuadra e Tottenhamit ka shkarkuar edhe trajnerin e përkohshëm, italianin Cristian Stellini.
Shkarkimi i Stellinit ka ardhur një ditë pas humbjes së thellë të Tottenhamit në udhëtim te Newcastle Unitedi, me rezultatin 6:1.
Të hënën, nëpërmjet një njoftimi, Tottenhami ka njoftuar se Stellini do të largohet me efekt të menjëhershëm së bashku me stafin e tij.
Në vend të Stellinit, është emëruar Ryan Mason, i cili ka punuar përkrah italianit pas largimit të Contes. Stellini pati marrë drejtimin e Tottenhamit pas largimit të Contes në fund të muajit mars.
Në nëntë ndeshje të luajtura në të gjitha garat nën drejtimin e Stellinit, Tottenhami ka regjistruar 5 fitore, 1 barazim dhe 3 humbje.