Tri anije që transportonin, gjithsej, 58,041 tonë misër janë autorizuar të largohen nga portet ukrainase të premten, si pjesë e një marrëveshjeje për të zhbllokuar eksportet e grurit, pasi një ofensivë ruse e detyroi Ukrainën të lëshonte territorin në lindje të saj.
Anija e parë që transportonte drithë ukrainas u lejua të largohej nga porti i Odesës të hënën për në Liban, nën një marrëveshje kalimi të sigurt të ndërmjetësuar nga Turqia dhe Kombet e Bashkuara.
Qendra e Përbashkët Koordinuese në Stamboll, e cila grupon personelin rus, ukrainas, turk dhe të OKB-së, tha se dy anije do të niseshin nga Chornomorsk dhe një nga Odesa, të premten.
Nga Chornomorsk, “Polarnet” do të nisej për në Karasu në Turqi me 12,000 tonë misër dhe Rojen do të çonte 13,041 tonë misër në Teesport në Britani.
Nga Odesa, “Navistar” do të çonte 33,000 tonë misër në Ringaskiddy të Irlandës.
Anija turke “Osprey S”, që mban flamurin e Liberisë, pritej të mbërrinte në portin Chornomorsk të Ukrainës të premten, ka bërë të ditur administrata rajonale e Odesës.
Që nga pasditja e së enjtes, Osprey S ishte ankoruar në Detin Marmara, rreth 1 km (0.62 milje) nga bregu aziatik i Stambollit, së bashku me anije të tjera që prisnin të kalonin Bosforin për në Detin e Zi, sipas një gazetari të Reuters.
Presidenti rus, Vladimir Putin dërgoi trupa në Ukrainë më 24 shkurt, duke shkaktuar konfliktin më të madh në Evropë që nga Lufta e Dytë Botërore dhe duke shkaktuar një krizë globale të energjisë dhe ushqimit.
Ukraina dhe Rusia prodhojnë rreth një të tretën e grurit global dhe Rusia është furnizuesi kryesor i Evropës me energji.
Ukraina ka bërë thirrje që marrëveshja e grurit të zgjerohet për të përfshirë produkte të tjera, të tilla si metalet, raportoi Financial Times.
“Kjo marrëveshje ka të bëjë me logjistikën, me lëvizjen e anijeve nëpër Detin e Zi”, tha për gazetën zëvendësministri i ekonomisë i Ukrainës, Taras Kachka.
Ndër të tjera, Moska po kërkon të kontrollojë Donbasin kryesisht rusishtfolës, i përbërë nga provincat Luhansk dhe Donetsk, ku separatistët pro Moskës fituan kontrollin e territorit pasi Kremlini aneksoi Krimenë në jug, në vitin 2014.
Zelenskyy foli për luftime të ashpra rreth qytetit Avdiivka dhe fshatit të fortifikuar Pisky, ku Ukraina ka pranuar “suksesin e pjesshëm” të armikut të saj rus në ditët e fundit.
Ushtria ukrainase tha të enjten se forcat ruse kishin kryer të paktën dy sulme në Pisky, por ishin zmbrapsur.
Gjenerali ukrainas, Oleksiy Hromov tha në një konferencë për shtyp se forcat e tij kishin rimarrë dy fshatra rreth qytetit lindor të Slovianskut, por ishin shtyrë në qytetin Avdiivka pasi u detyruan të braktisnin një minierë qymyrguri që konsiderohet si një pozicion i rëndësishëm mbrojtës.
Ministria ruse e mbrojtjes konfirmoi ofensivën e saj.
Reuters nuk mundi të verifikonte menjëherë pohimet e asnjërës palë.
Lufta në Ukrainë ka zhvendosur miliona, ka vrarë mijëra civilë dhe ka lënë qytete, qyteza dhe fshatra në rrënoja.
Ukraina dhe aleatët e saj perëndimorë kanë akuzuar forcat ruse për shënjestrimin e civilëve dhe krimeve të luftës, akuza që Rusia i kundërshton.
Të premten, Shtabi i Përgjithshëm i Ukrainës tha se bombardimet ruse të shumë qyteteve anembanë vendit synuan sërish vendbanimet civile si dhe infrastrukturën ushtarake.